สนฺนยฺห พลกายํ โส, สกฺกเสนาปติํ สกํ;
พลสฺส นายกํ กตฺวา, มหายิตฺถมุปาคมิฯ
[73]
วิชยํ ปุพฺพราชูนํ, วตฺวา เวลาตเฏ ฐิโต;
อุสฺสาหํ ชนยิตฺวาน, นาวํ อาโรปยี พลํฯ
[74]
พลกายํ สมาทาย, สกฺกเสนาปติํ ตทา;
สุเขน สาครํ ติณฺโณ, ปณฺฑุเทสมุปาคมิฯ
[75]
ทิสฺวา พลญฺจ ตญฺเจว, ปณฺฑุราชา สุมานโส;
เอกจฺฉตฺตํ กริสฺสามิ, ชมฺพุทีปนฺติ อพฺรวิฯ
[76]
พลทฺวยํ คเหตฺวาน, ราชา โส โจฬวํสชํ;
เชตุํ อสกฺกุณิตฺวาน ยุทฺธมุชฺฌิย นิกฺขมิฯ
[77]
ยุชฺฌิสฺสามีติ คนฺตาน, สกฺกเสนาปตี ปุน;
นิสินฺโน อุปสคฺเคน, มโต ปาเปน ปณฺฑุโตฯ
[78]
ลํกิสฺสโร พลสฺสาปิ, เตน โรเคน นานสํ;
สุตฺวา ทยาลุภาเวน, เสนํ อาณาปยี ตโตฯ
[79]
สกฺก เสนาปติฏฺฐานํ, ตสฺส ปุตฺตสฺส’ทา ตทา;
วฑฺเฒสิ เตน ตํ ปุตฺตํ, กตฺวา เสนาย นายกํฯ
[80]
นิกายตฺตยวาสีหิ, ปริตฺตํ นคเร ตทา;
กาเรตฺวา โรคทุพฺพุฏฺฐิ-ภยํ นาเสสิ ชนฺตุนํฯ
[81]
สาสนสฺส จ โลกสฺส, สนฺติํ กตฺวา อเนกธา;
ราชา โส ทสเม วสฺเส, สุเขน ติทิวํ คโตฯ
[82]
ลํการชฺเชปิ ฐตฺวา กถิตติปิฏโก สพฺพวิชฺชาปทีโป,
วตฺตาวาที กวี โส สติธีติวิสโท เทสโก ภาวโก จ;
ปญฺญาสทฺธาทยา วา ปรหิตนิรโต โลกเวทีวทญฺญู;
ราชินฺโท กสฺสโป’ยํ วิย วิมลคุโณ โหตุโลโกปิ สพฺโพฯ
สุชนปฺปสาทสํเวคตฺถาย กเต มหาวํเส
ทฺวิราชโก นาม
ปญฺญาสติโม ปริจฺเฉโทฯ
เอกปญฺญาสติม ปริจฺเฉท
ปญฺจราชโก นาม
[1]
ยุวราชา ตทา หุตฺวา, ราชา ทปฺปุฬนามโก;
ฐเปสิ โอปรชฺชมฺหิ, อาทิปทํ สนามกํฯ
[2]
มริจวฏฺฏิวิหารสฺส, คามํ ทตฺวา ตโต ปุเร;
จาริตฺตํ ปุพฺพราชูนํ, รกฺขิตฺวาน มหิํ อิมํฯ
[3]
อภุตฺวา ทีฆกาลญฺหิ, ปุพฺพกมฺเมน อตฺตโน;
ราชา โส สตฺตเม มาเส, ปวิฏฺโฐ ปจฺจุโน มุขํฯ
[4]
อุปราชา อหุราชา, ทปฺปุโฬ ตทนนฺตรํ;
อุทยสฺสาทิปาทสฺส, ยุวราชปทํ อทาฯ
[5]
ตทา โจฬภยา ปณฺฑุ-ราชํ ชนปทํ สกํ;
จชิตฺวา นาวมารุยฺห, มหาติตฺถมุปาคมิฯ
[6]
อาณาเปตฺวาน ตํ ราชา, ทิสฺวา สนฺตุฏฺฐมานโส;
มหาโภคํ อทา ตสฺส, นิวาเสสิ ปุรา พหิฯ
[7]
โจฬราเชน ยุชฺฌิตฺวา, คเหตฺวา ปฏฺฏนทฺวยํ;
ปณฺฑุราชสฺส ทมฺมีติ, สนฺนทฺเธ ลงฺกราชินิฯ
[8]
เกนา’ปิ กรณีเยน, ขตฺติยา ทีปวาสิโน;
อกํสุ วิคฺคหํ โฆรํ, ปาปกมฺเมน ปณฺฑุโนฯ
[9]
ปณฺฑุราเช’ตฺถ วาเสน, กมฺมํ นตฺถีติ จินฺติย;
ฐเปตฺวา มกุฏาทีนิ, คโต เกรฬสนฺติกํฯ
[10]
วิคฺคเห นิฏฺฐิเต ราชา, มหาเมฆวเน ตทา;
มหาโพธิฆรสฺสา’ทา, คามํ นครสนฺติเกฯ
[11]
อาวาสํ รกฺขโก นาม, ตสฺส เสนาปตี อกา;
ถูปารามสมีปมฺหิ, อิฬงฺโค ราชนามกํฯ
[12]
กตํ ตํ ปุพฺพราเชหิ, ราชา โส ปริปาลิย;
ปตฺโต ทฺวาทสมํ วสฺสํ, ยถากมฺมมุปาคมิฯ
[13]